Adobe Flash Player 雖然有推出 Linux 的版本，但 Adobe（包括較早的 Macromedia) 規冬來只有 32 位元的版本 (i386)。對誠濟為著系統效能，選擇安裝 64 位元版本 (x86_64) Linux 系統的用戶來講，愛一直忍受無法度觀看 Flash 網頁的不便。佇 Adobe 無推出 Flash Player 的 x86_64 版本進前，其實猶有解決步數。

有朋友共老刀通知講，微軟最近推出新版的 Outlook Connector，會凍佇 Windows 下跤離線收/發 Hotmail 信箱的批；老刀安裝試用的結果真是滿意，所以嘛報這个好空予你知影。佇 Outlook 2003 安裝 Outlook Connector 了後，功能表加一个 "Outlook Connector"（參考頂頭的圖），只要內底拍入 Hotmail 的電子郵件信箱，著會凍收/發 Hotmail 的批啊。

Flickr 是 Yahoo（雅虎）提供的線上翕相簿管理服務；老刀佮全世界規百萬人同款，攏是 Flickr 的愛用者。最近 Flickr 根據怹網站內底有記錄地理位置 (geotagged) 的數千萬張相片，推出了「世界熱點」佮「地圖」2 个新功能。（頂圖：flickr「世界熱點」）「世界熱點」這个功能會凍予你佇 Flickr 頂頭遊覽任何國家、城市佮特定場所。只要拍入你想欲觀賞相片的所在（親像頂圖的「花蓮市」），Flickr 會自動替你整理當地所翕的相片，你所需要的只是一張一張觀賞著好。（頂圖：flickr 新版「地圖」）新版「地圖」凍予你佇 Flickr 頂頭「環遊世界」。著親像伊的名仝款，你只要對地圖點一咧，Flickr 著會自動整理當地所翕的相片，方便你瀏覽。若有進一步的問題，請參考 Flickr 對這 2 个新功能的說明。